話說唔小心做左2個訪問，佢地不約而同地問左同樣既問題，我覺得幾有趣。佢地問我，點睇依家既抽水?咁我諗首先要知道抽水係咩意思，我對抽水既理解係─無論係政治,娛樂,生活所引起既話題，加以自己既諗法再演繹出嚟，令人聯想到個件事既作品，就係所謂既抽水。
1.單單講今年，葉劉比麒麟一野彈開，係所有人都loop完又loop，陶醉緊個一幕既時候，麒麟啤輕輕一句「飲返罐麒麟，感謝佢今日為我地帶嚟最開心、精彩同一番爽快既時刻!」掌聲不斷，個個都話要飲麒麟啤先得，如果係真既，我諗佢個日已經做到上年既業績。
2.「點解會咁既,好打耳呀!!」、以震撼性既聲音發出「睇L住啊」、依D句子應該冇人唔識，簡直係語文界既may姐，中文權威TreeGun都未必教到你既句子。就係咁，依D都係沿自電視節目中，簡簡單單一句。只要夠啅頭，有話題性，就足以受到大眾熱議，成為抽水既題材。
3.藝人方面，劉浩龍一對污糟手言論，直頭係出晒位啦，人抽水佢抽水，抽到引嚟大量網民不滿，jolly shandy9秒9就用對手加罐飲品，「我頭先去食碗麵，對面坐咗位人兄隻手係咁嘅。我無對呢雙污糟嘅手投降，我只係買咗罐凍飲，幫佢開埋，希望佢可以紓解工作壓力。生活不易啊！」就係咁，一個藝人就俾人插到爆菊花，一個飲品就啱啱爆完人菊花咁，春風滿面。如果佢既PR有容祖兒「自嘲似艾辛」咁，大方得體又有笑位，又點會搞成咁。所以做人，對事，公關真係好重要，學子華話齋，做人冇公關，食屎架喇。
4.再嚟想講既又點小得「等埋發叔」，當日開完會，成個fb都已經係等埋發叔，大內密探零零發都出埋，連田少就忍唔住抽埋一份，話佢D隊友係豬。再係事隔一個月後，佢D豬隊友推左等埋發叔成單野個責任落佢到個時，佢都不慌不忙地繼續抽水，話「豬都蠢唔晒既，不過係慢左D。」即使係自己友，智商真係明顯地高下立見，到近排再嚟多個熱廚房理論，「個廚係掂嘅，就多多人都肯走入熱廚房幫手！唔掂嘅就.....」食野參觀廚房，都可以拉埋政治嚟講。真係畀你吹到啤一聲，如果田少唔玩政治，去做PR都可能係世界上最老既PR。
5.到最近，有個老坑突然主動被跌倒了，幸福醫藥，美麗華PR今次叻叻豬，醒水喇，抽水執輸行頭，慘過敗家。但今次似乎係抽水既道路上跌得痛過個老坑，因為佢地post完又刪，係我眼中，全部責任唔係PR身上，因為諗得到咁玩既，已經值得讚一讚D PR。但抽政治水始終有風險，出之前都應該諗清諗楚，請示下係個班坐係office，決定一切既19高層。反而到依家刪除左，就帶上埋過街老鼠既稱號，由一個建立左好耐既形象，插水插得深過個老坑，落入人人喊打既洗版裡面，真係多一事不如少一事，唔抽好過抽。
但有時，對於政治既好多話題，已經唔存在想抽水依個念頭，而係想表達自己想講既野，訴諸依個已經慢慢變質，發生好多荒誕事既社會。抽水好，點都好，反正對我嚟講，都會怕得失好多野，但我更清楚既係，能講到自己想講既野，良知更重要。
抽水，慢慢地就變左係香港獨有既一個文化，係依個飯可以唔食，水唔能夠唔抽既年代，抽到一個靚既水，就好過你係ATV賣10年廣告。而慶幸既係，係依個連笑都變得奢侈既年代，自己仲識笑。
Search